01/02/2022.- La inauguración de la esposición Camino Primitivo d’Ediciones Pata Negra güei en Grau marca l’empiezu del circuitu Xacobéu esti añu, con una programación onde s’incluyen 40 eventos de 23 compañíes en 18 conceyos hasta xunu, con un presupuestu de 74.000 euros. Esti circuitu forma parte d’ Asturies, Cultura en Rede, un proyectu dela Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola sociedá pública, nos que tamién s’incluyen circuitos temáticos d’artes escéniques, artes visuales, música, cultura tradicional, lliteratura y Autores nel Camín.

El circuitu Xacobéu incluye, amás de la muestra Camino Primitivo, espectáculos, conciertos, recitales y otres actividaes culturales que promueven la difusión, divulgación y promoción del Camín de Santiago de la que pasa per Asturies y del patrimoniu material y inmaterial que lu conforma.

Tina Gutiérrez va ufiertar un recital de música y poesía con Asturias y Galicia. Un solo corazón en Tapia y Candás, Xune Elipe va facer un percorríu per La música asturiana nel Camín de Santiago en Candamu y Grau y El Arca de Mozart va llevar les sos Músicas peregrinas: un paso santo, otro no tanto a Navia, Tapia y Ḷḷena. Lee Wolfe va conducir al público per mil años de música n’El primer camín en Corvera y El Coro de las Otras Voces con Kalatos Servicios va amosar El sonido de las palabras en Ribadeva. Amás Alfredo González va actuar en Llanes; la Orquesta Céltica Asturiana con Pasu a pasu. Músicas del Camín, en Navia y Llanes; y Slum Suit, con Siguiendo el camino de Iturralde, en Grau.

Elisabet Martín Teatro va poner n’escena ¡Buen camino! Historias y leyendas del Camino de Santiago en Ribeseya, Grau y Muros de Nalón; Teatro del Cuervo, Diálogo de El amor y un viejo en Navia; Teatro del Norte, El Lazarillo de Tormes en Ribeseya, Ḷḷena y Candás; y Producciones Nun Tris, El pelegrín valiente en Tinéu y Villaviciosa. Los Cuentos del Camino de Milio’l del Nido (El peregrino de los cuentos) d’Economía por Ondas Epo Producciones van llegar a Ḷḷena y Colunga; Los Tuñón en el Camino d’El Jaleo Producciones Artísticas, a Ḷḷena y Ribadeva; y El Xuglar del Camín de Carlos Alba Cellero, a Ribeseya.

Higiénico Papel Teatro va representar Diestro y Siniestro por el Camino en Cuaña, A Veiga y Ribeseya y Pícaros y Reyes en el Camino en Navia; y El Callejón del Gato, El Camino Entretenido en Corvera. Amás el públicu va poder disfrutar d’El campo de la estrella de Dana Raz Dance Projects en Colunga  y de Los cuentos del Camino de David Acera en Salas y Villaviciosa.

La charla La sidra nel Camín de Santiagu de Cuatro Gotes Producciones en Candamu, la yincana dixital El primer peregrino con Blinca en La Ribera y el taller infantil Vivir en la Asturias medieval de Pintar-Pintar en Salas y La Ribera completen la programación del circuitu Xacobéu pa los meses venideros.

La programación actualizada de los circuitos pue consultase na web asturiesculturaenrede.es.